Dilynwch y Pwyllgor ar Twitter @SeneddPPIA
Y tymor hwn mae’r Pwyllgor yn cynnal ymchwiliad i Addysg a Dysgu Proffesiynol Athrawon. Bydd sesiynau tystiolaeth lafar ffurfiol yn cael eu cynnal yn ddiweddarach yn y tymor.
Mae’r Pwyllgor hefyd wedi lansio ymgynghoriad sy’n dwyn y teitl ‘Y 1000 diwrnod cyntaf’ – i ystyried i ba raddau y mae polisïau a rhaglenni Llywodraeth Cymru yn cefnogi rôl rhieni yn y blynyddoedd cynnar, yn y cyfnod cyn geni ac yn ystod dwy flynedd gyntaf bywyd plentyn ac, yn hollbwysig, pa mor effeithiol ydynt ar gyfer cefnogi galluoedd a datblygiad emosiynol a chymdeithasol plant. Y bwriad yw y bydd y dystiolaeth a geir yn cyfrannu at ymchwiliadau’r Pwyllgor yn y dyfodol.
Mae’r Bil Anghenion Dysgu Ychwanegol a’r Tribiwnlys Addysg (Cymru) wedi’i gyfeirio at y Pwyllgor. Mae’r Pwyllgor wedi lansio ymgynghoriad ac arolwg. Dechreuodd y gwaith craffu yng Nghyfnod 1 ar 12 Ionawr pan ddaeth Gweinidog y Gymraeg a Dysgu Gydol Oes i’r cyfarfod Pwyllgor i roi tystiolaeth. Cynlluniwyd rhagor o sesiynau tystiolaeth lafar ar gyfer mis Mawrth. Fel rhan o ymgysylltiad y Pwyllgor â’r cyhoedd, cynhelir cynhadledd ar 26 Ionawr, pan fydd dros 80 o bobl yn bresennol, ac ar 9 Chwefror bydd y Pwyllgor yn cynnal gweithdai yng Ngogledd a De Cymru gyda rhieni a gofalwyr ac yn cwrdd â phobl ifanc.
Ar 18 Ionawr daeth Ysgrifennydd y Cabinet dros Iechyd, Llesiant a Chwaraeon a’r Gweinidog Iechyd y Cyhoedd a Gwasanaethau Cymdeithasol ar gyfer sesiwn graffu gyffredinol. Ar 25 mis Ionawr bydd y Cadeirydd yn gwneud datganiad yn y Cyfarfod Llawn ar waith y Pwyllgor hyd yma yn y Pumed Cynulliad, ac ar ei ymchwiliadau a’i waith ymgysylltu yn y dyfodol.
Ar 1 Chwefror bydd cynrychiolydd o’r Coleg Brenhinol Pediatreg ac Iechyd Plant yn dod i’r Pwyllgor i drafod eu hadroddiad ar Gyflwr iechyd Plant, a gaiff ei gyhoeddi ar 26 Ionawr. Bydd y Prif Swyddog Meddygol yn dod i un o’r cyfarfodydd i drafod ei Adroddiad Blynyddol, a hwn fydd y tro cyntaf i’r Pwyllgor graffu ar yr adroddiad hwn. Ar 15 Chwefror, bydd Estyn yn bresennol i drafod ei adroddiad blynyddol.
Y tymor hwn hefyd, bydd y Pwyllgor yn cyhoeddi dau adroddiad - Darpariaeth Eiriolaeth Statudol a Grant Gwella Addysg: Plant Sipsiwn, Roma a Theithwyr, a phlant o leiafrifoedd ethnig.
Dilynwch y Pwyllgor ar Twitter @SeneddNHAMG
Mae’r Pwyllgor Newid Hinsawdd, Amgylchedd a Materion Gwledig yn edrych ymlaen at barhau â’i waith ar ddyfodol y polisi amaethyddol a’r polisi gwledig yng Nghymru. Rydym wedi clywed gan randdeiliaid am ffyrdd i ysgogi datblygu gwledig yn y dyfodol, ac rydym yn edrych yn fanwl ar y materion hyn drwy ymweld ag Iwerddon i weld y Rhaglen Burren. Bydd ein hymweliad â Galway yn rhoi cyfle i ni ddysgu am gynllun arloesol sy’n cefnogi busnesau amaethyddol i gynnal bioamrywiaeth.
Ar yr un ymweliad, bydd y Pwyllgor yn cwrdd â’r Gweinidog dros Amaethyddiaeth, Bwyd a’r Môr yn Iwerddon, yn Nulyn, ac yn dysgu oddi wrth y Prif Swyddog Milfeddygol am eu dull o fynd i’r afael â thwbercwlosis mewn gwartheg.
Rydym wedi dechrau ar ymchwiliad i reoli Ardaloedd Morol Gwarchodedig yng Nghymru, a byddwn yn clywed gan arbenigwyr blaenllaw ar y materion y mae angen eu cydbwyso wrth gynnal y meysydd hyn. Byddwn yn datblygu’r gwaith hwn gydag ymweliad ag Aberdaugleddau i gwrdd â rhai sy’n gweithio ar y cynllun Ardal Cadwraeth Arbennig Forol Sir Benfro.
Byddwn yn cynnal cyfarfod cyntaf y Grŵp Cyfeirio Arbenigol ar Newid yn yr Hinsawdd ym mis Chwefror. Bydd y grŵp hwn yn rhoi cymorth i’r Pwyllgor graffu ar y cynnydd a wneir gan Lywodraeth Cymru o ran cyrraedd ei thargedau ar liniaru newid yn yr hinsawdd. Mae hyn yn cynnwys craffu ar ôl deddfu ar Ddeddf yr Amgylchedd (Cymru) 2016 a Deddf Llesiant Cenedlaethau’r Dyfodol (Cymru) 2015.
Cyfarfu’r Pwyllgor, sydd newydd ei sefydlu, yn gyhoeddus am y tro cyntaf ar 18 Tachwedd y llynedd a ffocws eu sesiwn graffu oedd y Rhaglen Lywodraethu. Roedd amser hefyd wedi’i neilltuo ar ddiwedd y cyfarfod i Aelodau ofyn nifer o gwestiynau i’r Prif Weinidog ar faterion cyfoes.
Ar ôl cytuno yn flaenorol i gynnal dau o’u tri chyfarfod bob blwyddyn y tu allan i Gaerdydd, mae’r Pwyllgor i gyfarfod nesaf ddydd Gwener 17 Chwefror yng Nghanolfan Halliwell, Caerfyrddin. Bydd yr Aelodau yn gofyn i’r Prif Weinidog am ddull gweithredu strategol Llywodraeth Cymru o ran mynd i’r afael â thlodi. Unwaith eto bydd cyfle i ofyn cwestiynau amserol ar ddiwedd y cyfarfod.
Dilynwch y Pwyllgor ar Twitter @SeneddMCD
Y tymor hwn, bydd gwaith y Pwyllgor yn canolbwyntio ar ei ymchwiliad i ‘Lais Cryfach i Gymru: ymgysylltu â San Steffan a sefydliadau datganoledig’ a fydd yn ystyried effeithiolrwydd gweithio rhyng-sefydliadol. Bydd hyn yn datblygu’r gwaith sydd eisoes wedi cael ei wneud mewn deddfwrfeydd eraill a’r trafodaethau cychwynnol, anffurfiol ag academyddion a Llefarydd Tŷ’r Cyffredin, ac yn eu hadlewyrchu.
Lansiodd y Pwyllgor ei ymgynghoriad ym mis Rhagfyr a bydd yn clywed tystiolaeth lafar yn ystod y tymor sydd i ddod. Bydd yr ymgynghoriad yn cau ar 17 Chwefror 2017. Bydd y Pwyllgor yn sefydlu panel dinasyddion i gyfrannu at ei waith. Bydd y dull gweithredu hwn yn helpu i sicrhau y bydd y Pwyllgor yn clywed cydbwysedd o safbwyntiau, rhwng y rhai nad ydynt erioed wedi ymgysylltu a’r rhai sy’n ymwneud yn rheolaidd â’r Cynulliad. Wrth osod y cylch gorchwyl, nododd y Pwyllgor hefyd ei amcanion ar gyfer yr ymchwiliad, sy’n cynnwys nodi egwyddorion arfer gorau ar gyfer gweithio rhyng-sefydliadol.
Bydd y Pwyllgor hefyd yn paratoi i wneud rhagor o waith yn sgîl argymhelliad ein Pwyllgor ragflaenydd i sicrhau dull cyson ar gyfer penodi comisiynwyr, a’u hatebolrwydd. Cyfarfu’r Pwyllgor ag arbenigwyr yn y maes yn ystod tymor yr hydref i ofyn eu barn, er mwyn cynorthwyo i lunio gwaith y Pwyllgor. Cyhoeddir rhagor o fanylion maes o law!
Hefyd, bydd y Pwyllgor yn:
- craffu ar yr holl Filiau a gyflwynir i’r Cynulliad;
- craffu ar yr holl is-ddeddfwriaeth sy’n cael ei gosod gerbron y Cynulliad;
- monitro effaith Bil Cymru Llywodraeth y DU; ac
- monitro unrhyw ddatblygiadau cyfansoddiadol a fydd yn effeithio ar Gymru.
Dilynwch y Pwyllgor ar Twitter @SeneddDGCh
Dechreuodd y Pwyllgor Diwylliant, y Gymraeg a Chyfathrebu ar ddau ymchwiliad y tymor diwethaf, un i Strategaeth y Gymraeg newydd Llywodraeth Cymru, a fydd yn nodi sut y mae Llywodraeth Cymru yn bwriadu cyflawni ei nod datganedig o gael miliwn o siaradwyr Cymraeg erbyn 2050, a’r llall i gael golwg ragarweiniol ar ddarlledu yng Nghymru. Y tymor hwn byddwn yn parhau â’r ymchwiliadau hyn ac yn eu cwblhau. Rydym yn bwriadu cyhoeddi’r ddau adroddiad arnynt cyn diwedd y tymor.
Yn ogystal, cynhaliwyd arolwg barn gyhoeddus i benderfynu beth fyddai ei ymchwiliad nesaf. Mae’r Pwyllgor, o ganlyniad i’r arolwg, wedi dechrau ar ymchwiliad i ariannu addysg cerddoriaeth a gwella mynediad ati, sef cais buddugol y bleidlais. Ar hyn o bryd, rydym yn ymgynghori ar y cylch gorchwyl ac yn cynnal rhai sesiynau tystiolaeth ragarweiniol. Bydd yr ymgynghoriad cychwynnol yn cau ar 3 Chwefror; yna bydd yr ymchwiliad ei hun yn dechrau, a bydd yn parhau drwy gydol y tymor.
Yn olaf, mae’r Pwyllgor yn ddiweddar wedi cynnal un sesiwn ar ‘Reoliadau Safonau’r Gymraeg (Rhif 6) 2017’. Bwriadwn osod ein hadroddiad ar y rheoliadau mewn pryd ar gyfer y drafodaeth yn y Cyfarfod Llawn ar 31 Ionawr.
Dilynwch y Pwyllgor ar Twitter @SeneddESS
Bydd Pwyllgor yr Economi, Seilwaith a Sgiliau yn edrych ar y seilwaith digidol (band eang a’r seilwaith ffonau symudol) yn ystod mis Ionawr, a bydd yn cynnal ymchwiliad byr i ariannu’r ardoll prentisiaethau ym mis Chwefror. Byddwn hefyd yn cynnal rhai sesiynau seminar i edrych ar wahanol safbwyntiau o ran strategaeth economaidd newydd i Gymru.
Drwy gydol mis Mawrth byddwn yn dechrau clywed tystiolaeth lafar ar y fasnachfraint metro a rheilffyrdd - ein darn mawr o waith ar gyfer y tymor hwn.
Byddwn yn cyhoeddi ein hadroddiad ar y cynigion o ran Comisiwn Seilwaith Cenedlaethol i Gymru yn ddiweddarach y mis hwn (Ionawr).
Dilynwch y Pwyllgor ar Twitter @SeneddCLlLCh
Mae gan y Pwyllgor Cydraddoldeb, Llywodraeth Leol a Chymunedau raglen waith amrywiol yn ystod tymor y gwanwyn. Mae llawer o’r gwaith yn cael ei lywio gan yr ymgynghoriad a gynhaliwyd gyda rhanddeiliaid yn ystod haf 2016 ar flaenoriaethau’r Pwyllgor.
Bydd y Pwyllgor yn:
- Cynnal gwaith craffu ar Fil Undebau Llafur (Cymru) yng Nghyfnod 1. Bydd y Pwyllgor yn cyhoeddi ei adroddiad cyn y Pasg.
- Dechrau gwaith yn edrych ar dlodi yng Nghymru, ac yn cynnal digwyddiad i randdeiliaid ddiwedd mis Ionawr. Yn dilyn hyn, bydd y Pwyllgor yn clywed tystiolaeth gan Ysgrifennydd y Cabinet dros yr Economi a’r Seilwaith, cyn penderfynu ar y camau nesaf. Bydd hyn yn datblygu gwaith y Pwyllgor Cymunedau, Cydraddoldeb a Llywodraeth Leol yn ystod y Pedwerydd Cynulliad;
- Yn clywed tystiolaeth lafar ar gyfer yr ymchwiliad i hawliau dynol yng Nghymru. Bydd yr ymchwiliad yn edrych ar effaith y DU yn gadael yr Undeb Ewropeaidd ar hawliau dynol yng Nghymru; a chynnig Llywodraeth y DU i ddiddymu Deddf Hawliau Dynol 1998 a chyflwyno Deddf Hawliau Prydeinig i gymryd ei lle. Bydd hefyd yn ystyried canfyddiadau’r cyhoedd o ran hawliau dynol, a pha mor ddealladwy a pherthnasol ydynt i bobl Cymru. Bydd ymgynghoriad ysgrifenedig yn cau ar 10 Chwefror;
- Cynnal sesiwn graffu gyffredinol gyda’r Comisiynydd Cenedlaethau’r Dyfodol i Gymru ar 2 Chwefror;
- Cyhoeddi ei adroddiad ar ffoaduriaid a cheiswyr lloches yng Nghymru; ac
- Yn cynnal dadl yn y Cyfarfod Llawn ar ymchwiliad y Pwyllgor ar ôl y broses ddeddfu i Ddeddf Trais yn erbyn Menywod, Cam-drin Domestig a Thrais Rhywiol (Cymru) 2015.
Dilynwch y Pwyllgor ar Twitter @SeneddMADY
Cyhoeddodd y Pwyllgor ei adroddiad ar oblygiadau Brexit i Gymru. Wedi’i rannu yn ddwy ran, mae rhan gyntaf yr adroddiad yn edrych ar y materion sy’n dod i’r amlwg ar gyfer meysydd fel masnach, addysg, iechyd a’r amgylchedd. Mae’r ail ran yn rhoi ein barn ar sut y byddwn yn ymdrin â gwaith craffu ar Lywodraeth Cymru a Llywodraeth y DU wrth i broses drafodaethau erthygl 50 ddatblygu.
Gan edrych i’r dyfodol, byddwn yn cynnal sesiynau craffu rheolaidd gyda’r Prif Weinidog, arweinydd Llywodraeth Cymru yn y trafodaethau - Mark Drakeford AC, a chyda Gweinidogion perthnasol eraill i fonitro cynnydd ac i’w dwyn i gyfrif. Bydd y cerrig milltir allweddol yn cynnwys craffu ar ‘Fil Diddymu’ arfaethedig Llywodraeth y DU ac ysgogi Erthygl 50. Byddwn yn parhau i siarad â chyrff seneddol eraill ar draws y Deyrnas Unedig, gan gynnwys cynnal cyfarfodydd gyda chymheiriaid yn y Fforwm EC-UK ym mis Mawrth.
Gan ddatblygu ein gwaith ar oblygiadau Brexit, byddwn hefyd yn cynnal ymchwiliad i ddyfodol polisi rhanbarthol yng Nghymru drwy gydol tymor y gwanwyn.
Dilynwch y Pwyllgor ar Twitter @SeneddCyllid
Dechreuodd tymor prysur y gwanwyn gyda’r Pwyllgor yn craffu ar y Bil Treth Gwarediadau Tirlenwi (Cymru), sydd â 10 Mawrth yn ddyddiad cau ar gyfer cyflwyno adroddiad arno yng Nghyfnod 1. Bwriedir clywed tystiolaeth gan amrywiaeth o gyrff a bydd y Pwyllgor yn cynnal ymweliad â Safle Tirlenwi.
Cyhoeddodd y Pwyllgor ei adroddiad ar y Bil Treth Trafodiadau Tir a Gwrthweithio Osgoi Trethi Datganoledig (Cymru): Cyfnod 1 ym mis Rhagfyr 2016. Cynhaliwyd y ddadl Cyfnod 1 ar 10 Ionawr, a chymeradwywyd yr egwyddorion cyffredinol gan Gynulliad Cenedlaethol Cymru. Dechreuodd trafodion Cyfnod 2 ar 11 Ionawr, a’r dyddiad a drefnwyd ar gyfer pleidleisio ar y gwelliannau yng Nghyfnod 2 yw 16 Chwefror.
Bydd y Llywodraeth yn gosod Ail Gyllideb Atodol 2016-17 Llywodraeth Cymru ar 7 Chwefror, er mwyn i’r Pwyllgor graffu a chyflwyno adroddiad arni cyn y ddadl ar 7 Mawrth.
Yn ogystal, bydd y Pwyllgor yn dechrau craffu ar oblygiadau ariannol y Biliau eraill a gyflwynwyd gerbron y Cynulliad, fel y Bil Iechyd y Cyhoedd a’r Bil Anghenion Dysgu Ychwanegol.
Mae’r Pwyllgor hefyd wedi gwahodd yr Ysgrifennydd Gwladol Cymru, Archwilydd Cyffredinol Cymru ac Ysgrifennydd y Cabinet dros Gyllid a Llywodraeth Leol i fynychu’r Pwyllgor ynghylch gweithrediad Deddf Cymru 2014.
Dilynwch y Pwyllgor ar Twitter @SeneddIechyd
Bydd y Pwyllgor yn parhau i glywed tystiolaeth ar y Bil Iechyd y Iechyd (Cymru) er mwyn cwblhau ei waith craffu ac adrodd ar egwyddorion cyffredinol y Bil (Cam 1) erbyn 10 Chwefror 2017. Yn ddiweddarach yn y tymor bydd y Pwyllgor yn cynnal trafodion Cyfnod 2, pan fydd yn rhoi ystyriaeth fanwl i unrhyw welliannau a gyflwynir i’r Bil.
Yn ystod y tymor hwn bydd y Pwyllgor hefyd yn craffu ar bolisi Llywodraeth Cymru mewn nifer o feysydd o fewn ei gylch gwaith. Ym mis Ionawr, gyda’r cyntaf o’r darnau hyn o waith, bydd y Pwyllgor yn clywed tystiolaeth gan randdeiliaid allweddol ar Gynllun Gweithredu Strategol Drafft ar Ddementia yng Nghymru Llywodraeth Cymru.
Fel rhan o’i raglen barhaus o waith ar gynaliadwyedd y gweithlu iechyd a gofal cymdeithasol, ym mis Chwefror, bydd y Pwyllgor yn dechrau clywed tystiolaeth lafar ar gyfer ei ymchwiliad byr i Recriwtio Meddygol. Mae’r Pwyllgor eisoes wedi cael 23 o ymatebion ysgrifenedig i’r ymgynghoriad fel rhan o’r ymchwiliad hwn.
Mae cyfle o hyd i gyflwyno eich barn i’r Pwyllgor o ran ei Ymchwiliad i Ofal Sylfaenol. Bydd ymchwiliad y Pwyllgor yn canolbwyntio ar rôl clystyrau (sef, grwpiau o feddygon teulu sy’n gweithio gyda gweithwyr proffesiynol eraill ym maes iechyd a gofal i gynllunio a darparu gwasanaethau yn lleol) fel ffordd o drawsnewid gofal sylfaenol. Gellir cyflwyno ymatebion i’r ymgynghoriad tan 3 Chwefror 2017.
Bydd y Pwyllgor hefyd yn lansio ymgynghoriad o ran ei ymchwiliad i raddfa ac effaith unigrwydd ac unigedd pobl yng Nghymru, yn enwedig pobl hŷn. Bydd yr ymchwiliad yn ystyried atebion polisi presennol yng Nghymru, a pha mor gost-effeithiol ydynt. Bydd y Pwyllgor hefyd yn ystyried i ba raddau y gallai mentrau i fynd i’r afael ag unigrwydd ac unigedd ymhlith grwpiau eraill helpu i fynd i’r afael â’r materion hyn ar gyfer pobl hŷn.
Yn ddiweddarach yn y tymor, bydd y Pwyllgor hefyd yn lansio ymgynghoriad ar gyfer ei ymchwiliad i’r defnydd o feddyginiaeth gwrth-seicotig. Bydd y Pwyllgor yn galw am dystiolaeth ar faterion sy’n codi o bryderon gan randdeiliaid ynghylch y defnydd amhriodol o gyffuriau gwrth-seicotig i reoli symptomau ymddygiadol a seicolegol.
Dilynwch y Pwyllgor ar Twitter @SeneddDeisebau
Disgwylir i’r Pwyllgor ystyried 16 o ddeisebau newydd dros y tymor hwn, yn ddarostyngedig i unrhyw ddeisebau derbyniadwy newydd sy’n dod o fewn yr amserlen. Bydd yr Aelodau yn parhau i ystyried y wybodaeth ddiweddaraf o ran y deisebau sy’n cael eu hystyried ar hyn o bryd.
Mae’r Pwyllgor yn y broses o gyhoeddi ei adroddiad cyntaf ar Gefnogi Sgrinio blynyddol ar gyfer Canser yr Ofari (prawf gwaed CA125). Mae’r adroddiad yn cynnwys nifer o argymhellion i Lywodraeth Cymru.
Bydd y Pwyllgor yn parhau i ystyried ei adroddiad ar yr adolygiad o’r broses ddeisebau. Yn amodol ar gytundeb y Pwyllgor Busnes, gall hyn gynnwys rhai newidiadau i’r broses ddeisebau yn y dyfodol.
Mae’r Aelodau hefyd yn cyfarfod â deisebwyr, e.e. Whizz-Kidz, er mwyn casglu rhagor o dystiolaeth ar gyfer y ddeiseb ar Sicrhau y gall Pobl Anabl Ddefnyddio Trafnidiaeth Gyhoeddus Pryd Bynnag y Bo’i Hangen Arnynt (P-05-710).
Mae gan y Pwyllgor gyfarfodydd a drefnwyd ar gyfer 17 Ionawr; 31, Ionawr; 14 Chwefror; 7 Mawrth; 21 Mawrth a 4 Ebrill.
Dilynwch y Pwyllgor ar Twitter @SeneddArchwilio
Cyhoeddodd y Pwyllgor ei adroddiad ar ei waith Craffu Blynyddol ar Gyfrifon sefydliadau a ariennir gan y cyhoedd ym mis Rhagfyr 2016. Daeth y Pwyllgor i’r casgliad fod Cyfrifon ac Adroddiadau Blynyddol yn dod yn fwy tryloyw a hygyrch.
Yn ystod tymor y gwanwyn, bydd y Pwyllgor yn clywed tystiolaeth ar gyfer ei ymchwiliad i Drefn Reoleiddio Cymdeithasau Tai. Cynhaliwyd digwyddiad rhanddeiliaid llwyddiannus gyda thenantiaid Cymdeithasau Tai fis Rhagfyr diwethaf, i lywio’r ymchwiliad, a oedd yn cynnwys dros 50 o gyfranogwyr o bob cwr o Gymru.
Yn ddiweddarach yn y tymor bydd y Pwyllgor yn dechrau ymchwiliad i Gonsortia Addysg Rhanbarthol, pan fydd yn cyhoeddi ymgynghoriad ysgrifenedig yn ogystal â defnyddio arolwg ar-lein i glywed barn rhanddeiliaid. Bydd ymchwiliad byr yn cael ei gynnal hefyd, yn deillio o adroddiad yr Archwilydd Cyffredinol ar Gynhyrchu Incwm a Codi Tâl gan awdurdodau lleol.
Bydd gwaith monitro perfformiad yn canolbwyntio ar yr ymatebion gan Lywodraeth Cymru a diweddariadau ar waith blaenorol y Pwyllgor, gan gynnwys amseroedd aros y GIG ar gyfer gofal dewisol a Gwasanaethau Orthopedig.
Bydd y Pwyllgor hefyd yn ystyried nifer o adroddiadau Archwilydd Cyffredinol Cymru, gan gynnwys adroddiadau ar Reoli Meddyginiaethau a Llyfrgell Genedlaethol Cymru.
Cytunodd y Pwyllgor Safonau Ymddygiad i gynnal ymchwiliad i lobïo, a chyhoeddodd ymgynghoriad ysgrifenedig ym mis Rhagfyr 2016. Daw’r ymgynghoriad hwn i ben ar ddiwedd mis Ionawr 2017.
Daeth cyfnod Mr Gerard Elias fel Comisiynydd Safonau i ben ar 30 Tachwedd 2016, a chynhaliodd y Pwyllgor sesiwn ymadawol gydag ef, i ystyried yr hyn roedd yn teimlo oedd y prif gyflawniadau yn ystod ei gyfnod yn y swydd, a beth fyddai’r heriau yn y dyfodol ar gyfer y Comisiynydd newydd. Dechreuodd Syr Roderick Evans yn ei swydd fel y Comisiynydd Safonau newydd ar 1 Rhagfyr, a bydd y Pwyllgor yn cynnal sesiwn gydag ef yn gynnar yn 2017 i drafod beth fydd ei flaenoriaethau ar gyfer y rôl.